白话广州邓树群：铁塔凌云 金曲寻味

　　“小蛮腰”广州塔户外广告喺9月17日拍卖，底价1.5438亿，系前几年拆除“超高”塔尖成本嘅15倍。本城地标小蛮腰“卖身”，引起“广州塔变做广告塔”等等争议。我就谂起粤语流行歌曲鼻祖许冠杰嘅第一首唱作《铁塔凌云》。

　　1971年，许冠杰同大佬许冠文喺T V B主持咗讽刺时弊嘅情景喜剧节目《双星报喜》，当年4月23日开播，收视率好高，成为同类节目嘅开山鼻祖。亦正系喺呢个节目中，许冠文将自己出外游埠返港后嘅心得写成《铁塔凌云》歌词，由细佬许冠杰谱曲，并喺节目中首唱。《铁塔凌云》一经传唱，成为代表香港地域文化嘅标志性时代曲，喺香港粤语流行歌坛占有特殊地位。

　　呢首歌曲嘅第一句系：“铁塔凌云，望不见欢欣人面。”讲嘅系巴黎铁塔。点解睇唔到欢欣哩？跟住唱：“富士耸峙，听不见游人欢笑；自由神像在远方迷雾，山长水远未入其怀抱；檀岛滩岸点点粼光，岂能及渔灯在彼邦。”我哋听到咗一个香港人游历世界，人在旅途想念故土，钟情故地嘅心态同情怀，意图唤起香港人对本土文化嘅重视。许冠杰从这首歌开始“一发不可收”，大量创作通俗易懂、贴地气嘅粤语歌曲，开创咗香港粤语歌坛嘅流行曲时代。许冠杰被称为粤语流行歌坛嘅“鼻祖”同歌神。

　　而广州地标建筑物喺卅几年嚟不断更替，广州塔喺2010年610米嘅高度系中国第一高，虽然后嚟因为航空限制改矮10米，亦冇改变佢第一高嘅地位。小蛮腰铁塔凌云，代表咗广州人不断进取追求新高度嘅精神，系我哋自己嘅时代地标灵魂。唔论佢有乜嘢“何时何方何模样”嘅争议，都系新世纪广州人“此时此处此模样”顶天立地嘅高大上。稿源：[南方都市报]